جهاز حماية المستهلك تحوّل في زمن الانقلاب إلى جهاز مساعد للجهات التي تقوم بالنصب على المواطن، الجهاز يتلقى الكثير من الشكاوى من جشع التجار وضعاف النفوس واستغلال الشركات، ويزعم أنه يُجري الاتصالات اللازمة مع الجهات المشكوّ في حقها وأنه بصدد حل المشكلة وفي النهاية لا شيء، ولا يحصل الشاكي على حقه .
بذلك أصبح الجهاز الدرع الحامي للشركات والتجار، أما العملاء فليس لهم أي حقوق، هذه الأوضاع أثارت عددا كبيرا من الشكاوى بأن الجهاز لا يتحرك بجدية لبحث شكاوى المستهلكين ضد الشركات .
التقرير التالي يعرض شكاوى موثقة من بعض جروبات وسائل التواصل الاجتماعي، وكيف أن أصحابها اتجهوا للجهاز لكنهم لم يجدوا حلا أو ردا حاسما على شكاواهم ولم يتم رد حقوق المتضررين.
كارفور
في هذا السياق أكد محمد أحمد أنه قام بشراء جهاز أون لاين وتم إلغاؤه من قبل متجر شهير بعد رفع سعره 12 ألف جنيه مرة واحدة.
وكانت هذه شكواه عبر أحد الجروبات الكبرى على السوشيال ميديا، يحكي تجربة مريرة مع جهاز حماية المستهلك كالتالي، عاوز بس أشارك معاكم تجربتي مع جهاز حماية المستهلك في محاولة إنى آخد حقي من Carrefour Egypt كارفور ألغوا لي الطلب بعد ما سعر منتج رفع حوالي 12 ألف جنيه رجعت لحماية المستهلك بشكوى وقفلوها بناء على رد كارفور اللي كله مش صحيح وبتقصير متعمد من المحققة، ورجعت لحماية المستهلك بشكوى جديدة (1377507) بقالها اكتر من شهر ومع تهرب كارفور من المسئولية ،تم عرض الشكوى من المحققة على الإدارة العليا في الجهاز مع توصية بإلزام كارفور أنهم يسلموني الجهاز بالسعر اللي طلبت بيه المفاجأة بقى في رد الإدارة بحفظ الشكوى وعلى المتضرر اللجوء للقضاء، يعني التحقيق أوصى الإدارة أنهم يلزموا الشركة يسلموني الجهاز بسعره اللي طلبت بيه والإدارة العليا في الجهاز قرر حفظ الشكوى وعاوزاني أرفع قضية إللي مصاريفها هتبقى أكبر من فرق السعر دا، ودا يا جماعة جهاز حماية المستهلك، اللي هو المفروض بيعمل لصالح المستهلك ويحل مشاكله.. بيقوله روح ارفع قضية عشان إحنا مش هنعرف نعملك حاجة
شركة العربي
ويحكي أحمد سيد تجربة مريرة مع كبرى شركات المتاجر الإلكترونية قائلاً: شركة العربي تجربة مأساوية مع غسالة الأطباق تورنيدو أستلمتها في شهر أكتوبر ٢٠٢٤ وشغلتها في شهر ديسمبر واللي شغلها الفني المختص الخاص بشركة العربي بعد الاستعمال لمدة شهر واحد فقط ظهرت مشاكل في لوحة التحكم كلمت خدمه العملاء بتاريخ ٢٩ يناير ٢٠٢٥ وأبلغتهم بالمشكلة والحقيقة أرسلوا فني بسرعة، لكن للأسف جيه وقالي مفيش أي مشكلة وأن التاتش عادي أنه يعلق وتكررت الشكوى طبعاً، كلمت حماية المستهلك وعملت شكوى فيهم .
فريزر نوفروست
وقال محمود : “أنا قمت بطلب جهاز ديب فريزر ٥ درج نوفروست من شركة ألاسكا يوم 14/٢/٢٠٢٥ وتم توصيل الجهاز يوم الخميس 20/٢/٢٠٢٥ وبعد استلام الجهاز اتضح أنه به خدوش عند مقبض الباب خدشين وتم التواصل مع الشركة في نفس اليوم الذي استلمت فيه الجهاز وقاموا بإرسال الفني يوم الجمعة واطلع على هذه العيوب والخدوش، وقال اإنه سوف يبلغ الشركة أن الجهاز به عيوب ويجب استرجاع الجهاز وسحبه وبعد ذلك يعرض على الإدارة أولاً يوجد الكثير من الإجراءات أولاً قمت بعمل شكوى فى حماية المستهلك يوم الجمعة ٢٠٢٥/٢/٢١ وقالوا إنه سوف يتم التواصل معي في أقرب وقت وحتى هذا اليوم ولا يوجد حل حتى الآن .
معارض الأثاث
ويحكي أيمن عبر جروب مخصص لشكاوى الأثاث تجربته ويقول : “تحذير من التعامل مع معرض Carpiture للأثاث، أشتريت من عندهم غرفة نوم وبعد أقل من ٦ شهور!!! ظهر شروخ في خشب الدولاب والسراير بدون أي سبب وعلى مدار ٦ شهور بحاول أتواصل معاهم علشان بس يبعتوا حد من الصيانة يشوف المشكلة ومفيش أي استجابة نهائي والكول سنتر عندهم مش شغال أصلاَ، وروحت الفرع اللي اشتريت منه وكل مرة بيتقالي هنبعتلك حد وبعدها مفيش أي حد بيتواصل معايا وأنا عملت شكوى في جهاز حماية المستهلك وياريت محدش يشتري أي حاجة من عندهم لأن خامتهم كلها سيئة جدا وأسعارهم غالية على الفاضي، وأسوأ خدمة ما بعد البيع ومش شاطرين غير في الماركيتينج والسوشيال ميديا بس للأسف، وأنا شاري من عندهم برضو ٢ أنتريه والكنب كله هبط بشكل مش طبيعي بعد ٦ شهور فقط!! ده غير أنهم جابولي لون أنتريه مختلف غير اللي أنا مختاره وكنت طالب تعديلا في شاسيه الكنبة ومتعملش واضطريت في الأخر أغير الإنتريه كله بشكل تاني خالص .
شركة ماونت فيو
في القطاع العقاري يحكي مفيد ميلاد تجربته عبر أحد جروبات التسويق العقاري، ويقول: “تجربتي في مشروع جريان من قبل شركة ماونت فيو، في البداية كلموني وخلوا كل الدنيا وردي أقنعوني أني أشتري وحدة في مشروع جريان مع مونت فيو وكل حاجة جميلة، رحت ماونت فيو والسيلز بتوع ماونت فيو قالو لازم تلحق تحط جدية حجز للوحدة علشان الوحدات هتخلص، سألت على التفاصيل قالو لسه مش متاحة حالياً وقلت طيب هحط فلوس بناء على إية قالوا على مصداقية الشركة واسمها لو فيه أي مشكلة حضرتك تقدر تسترد فلوسك كاملة مش بيتخصم حاجة قبل كتابة العقد، واتفقت إني هدفع الدفعات بشكل سنوي وحطيت الفلوس فعلا معاهم، وبعدها بفترة جالي مكالمة تليفون من ماونت فيو بيقولو فيها العقود خلاص نزلت لازم تدفع 5% في خلال 10 أيام وإلا هيتم فسخ العقد وهتتغرم 20%، ونظام الدفع السنوي اتلغى بقى كل 3 شهور بس، قولتلوا السنوي هو نظام الدفع الوحيد اللي أقدر أدفع بيه قالي خلاص اتلغى، طلبت أني أكنسل الوحدة قالوا لو اتكنسلت هتخسر 20% وكل ده وأنا ممضتش على ورقة واحدة معاهم لحد الآن، هما غيروا فى كلامهم والعميل هو اللي بيتحمل.
كلمتني واحدة من ماونت فيو مديرة كبيرة هناك وكانت الخيارات يا أخرج وأخسر 20% وأنا ممضتش على أي ورقة بتقول كده يا أكمل في نظام مش مناسب معايا نهائي، وكل ما أقول لحد مش ده اللي اتفقت معاكم عليه يقولو ديه قرارات جديدة من دولة العسكر مش في إيدينا، كل واحد فيهم يقولي عندك حق وده حقك بس مشكلة المشروع ده مع الدولة وديه تعليمات جتلنا والدولة مش بترجع فلوس لحد. حقيقي مش عارف أعمل أيه، أتمنى الموضوع ينتشر يمكن أخد حقي أو أحذر حد تاني من الفخ ده لأن مفيش مصداقية نهائي، وعملت شكوى في حماية المستهلك ومجاليش أي رد وطول الوقت الموقع واقع في متابعة الشكوى وده رقمها 1192246 لو حد يقدر يساعدني .
